Deutsche Helden: Heinrich Pantaleon, Der Teutschen Nation wahrhaffte Helden (1567–70)

I. Teutscher Nation Heldenbuch, 1567

Das Erste theil Teutscher Nation Heldenbuch: Inn diesem werden aller Hochuerrümpten Teütschen personen / Geistlicher vnd Weltlicher / hohen vnnd nideren staths / Leben vnnd nam̅hafftige thaten gantz warhafftig beschriben / welliche durch jhre tugendten / grosse authoritet / starcke waffen / from̄keit / weißheit / vnnd gute künst / von anfang der welt / fürnemlich nach der Spraache verwirrung / biß auff den Grossen Carolum / den ersten Teütschen Keyser / auff das achthunderste jar nach Christi geburt / jhr vatterland Teütsche nation höchlichen bezieret vnd groß gemachet.

Erstlich durch den Hochgelehrten Herren Heinrichen Pantaleonem fast auß aller völckeren Historien / Chronecken / vnnd geschichtrodlen / mitt grosser arbeit fleissig zu Latein zusammen gezogen / vnnd mit sampt aller beschribener personen bildtnussen (so viel müglich) künstlich fürgestellet. Jetzmalen aber von dem ersten authore selbs verteütschet / gemehret / vnnd gebesseret / auch zu lob Teütscher nation inn Truck verfertiget. Also daß auch der Gemeine mann alle Teütschen Historien / von anfang der welt biß zu gemeldeter zeit / inn fürgestelleten personen jhren altuorderen leichtlich erkundigen. Alles gantz lustig / kurzweilig / vnd nutzlich zulesen.

Getruckt zu Basel bey Niclaus Brylingers Erben / Anno M. D. Lvvii.[1567]

[…]

Vorred.

[…]

Bey den Teütschen hat bißher solliches niemand in einem besonderē buch zu vollbringen vnderstanden. Wan̄ auch bey den alten etlicher weniger Helden leben beschriben / ist dieses dermassen mit vnnützen fablen vnd merleinen besudlet / daß kümerlich ein schatten der rechten warheit noch vohandē. Der gestalt ist Herr Thieterich von Bern / Meister Hildebrandt / Hürnen Seyfridt / getreuwe Eck / Herzog Ernst / vnnd andere der geleichen / von dem gemeinen volck in liederen vnd Meistergesangen geprisen worden. Also ist auch der from̅en alten Christen vnd Marterer Teütscher nation from̅keit / eyffer vnd gedult / in der Heiligen Legendt mit fablen vnd treümen vermischet / dz wenig gefälet / wir hetten die warheit mitt sampt den fablen verloren. Dann auß mangel vnserer Scribenten sein 8 alten Teütschen thaten verschwigen / oder mehrtheil von den außlendischen verfelschet vnnd verkleineret. Wann aber yemand der alten Historien / so noch vorhandē / fleissig ersuchet / diese mit ernst erwigt / vnnd deß einen farlessigkeit / ja fast boßheit / durch deß anderen fleiß vnd auffrechtigkeit ersetzet / wird er gewißlich finden / daß Teütsche nation vnser vatterland von deß Helden Tuisconis deß Nohe enckel zeiten für vnd für mitt streytbaren vnd hochuerstendigen menneren bezieret gewesen / ob sie wol in der geschrifft vnd freyen künsten noch nie viel gestudieret.

Wie ich solliches auß vielfaltigem lesen der Historien vermercket / hab ich mir fürgenom̅en / der hochuerümpten Teütschen personē leben vnd ehrliche thaten auß mancherley Historien / Cronecken / vnd geschichtrodlen zusam̅en zulesen / vnnd inn ein gewisse ordnung zubringen / damit die Teütsche jugend durch jrer altuorderen manheit vnd from̅keit bewegt / den selbigen mit großem lob begeret nachzufolgen. Dieweil mir aber mancherley staths menschen begegnet / hab ich mir nit alle vnsere König vnd Fürsten fürgenom̅en zubeschreiben / welche an anderē orten nach der lenge verzeichnet / sonder allein die Helden / welche mit viel tugendtē begabet / jre wolthaten dem vatterland bewisen / auch dasselbige man̄lich wider die außlendischen völcker mit jren waffen beschirmet / darzu mit guten gesangen bezieret : deßgeleichen diese / welliche die Abgötter zerstöret / der Heyden aberglauben verworffen / das vnuerstendige volck mit dem Wort Gottes vnderwisen/ vnd den Christenlichen glaubē in vnser vatterland gebracht: Zuletst auch diese / welche bey den Teütschen die kronen der marter entpfangē / oder welche durch jr schreiben vnd gute bücher bey den nachkom̅enden einen grossen nam̅en erlanget. Ich verhoffet zu anfang / es möchte dieses werck inn kurzem leichtlich außgemachet werden: als ich aber etliche jar darinnē gearbeitet / vnd viel Historien durchlesen / befande ich erst / daß ich ein burden auffgeladen / so mir viel zuschwer / vorab weil ich auch mit anderen geschefften zuthun / vnd durch keines sonderbaren Patronen hilff gefürderet / allso daß ich mögen dieser einigen arbeit (als billich gewesen) allezeit obligen / vnd darinnen verharren. Doch bin ich nicht destweniger / so viel mir müglich / dapffer fürgefaren / vnd zuletst das zeil so ich vermögen / vnnd nit so ich begeret / erlanget / auch hiemit mehr anderen hochuerstendigen zu dieser lustigen nutzlichen arbeit anlaß geben. Ich hab aber dieses gantze werck von hochuerümptē personen Teütscher nation / vō anfang der welt biß zu dem 1568 jar / auß gewissen vrsachen / in drey bücher abgetheilet.

Inn dem ersten buch / so wir yetzmalen vorhanden / haben wir diese Helden vnd heiligen personen fürgestellet / welche von anfang der welt bey den vralten Teütschen verrümpt gewesen / biß zu deß grossen Keyser Caroli zeiten / da man zalt von Christi geburt achthundert jar. Dann dazumal haben zuletst die inneren Teütschen den Christlichen glauben angenom̅en / viel Bistum̅ hin vnnd wider auffgerichtet / darzu deß Römischen Reichshochheit vnnd Mayestet mitt grossem lob auff sich gebracht / welches sie auch biß auff heutigen tag / auß Gottes gnaden / dapffer erhalten.

Inn dem anderen buch werden die Teütschen beschriben / welliche von dem grossen Keyser Carolo biß zu deß ersten Kayser Maximilian zeiten / sibenhundert jarlang / da man zalt von Christi geburt 1500 jar / jhr vatterland mit viel tugendten bezieret. Ob wir aber wol allein die fürnemsten Geistlichen vnd weltlichen Fürsten beschriben / haben wir doch die Bischoff / wie sie in eine̅ yeden Bistum̅ Teütscher nation auff einanderen biß zu vnserer zeit gefolget / bey dem ersten Bischoff erzellet. der gestalt haben wir auch die Fürsten stammen vnd geburtstaffeln / so auff heutigen tag Teütschland regieren / in disem andern buch / nach bestem vermögen / bey einem dapfferen Helden jhres geschlechts fürgestellet / damit man erkenne / wie ein König und Fürst auff den anderen erfolget / vnd zuletst das Regiment auff die vnseren Herren erwachsen seye. Es sein aber sonder allen zweiffel viel mehr Teütscher Helden / hohe / vnd nam̅haffte personē von anfang der welt biß zu gemeldeter zeit in Teütschem land gewesen / weder aber in diesen zweyen bücheren begriffen / welche durch der alten Scribenten liederligkeit in vergeß kommen / oder in den Historien / auß kürzester zeit / von mir noch nit vermercket / ob ich wol fleissig nachgesuchet / welliche zu anderen zeiten durch ein anlaß auch wol mögen hinein gesetzet werden.

[…]

II. Teutscher Nation Heldenbuch, 1568

Der ander Theil Teutsche Nation Heldenbuch: Inn diesem werden aller Hochuerrümpten Teutschen Personen / Geistlicher vnd Weltlicher / hohen vnnd nideren staaths / Leben vnnd nam̅hafftige thaten gantz warhafftig beschriben / welliche durch jhre tugendt / grosse authoritet / starcke waffen / from̅keit / weißheit / vnd gute künste / von dem Grossen Carolo vnnd ersten Teutschen Keyser har / in die siebenhundert jar / biß auff Kayser Maximilian den ersten / oder das fünffzehenhunderste jar / jr vatterland Teutsche nation höchlich bezieret / vnd groß gemachet. Mit sampt aller alten vnd neuwen Fürsten Teutscher nation Genealogey / Geburtstafflen vnd harkommen.

Erstlich durch den Hochgelerten Herren Heinrich Pantaleon fast auß aller völckeren Historien / Chronecken / vnd geschichtrodlen / mit grosser arbeit fleissig in Latein zusammen gezogen / vnnd mit sampt aller beschribener personen bäldtnussen (so viel müglich) könstlich fürgestellet. Jetzmalen aber von dem ersten Authore selbs verteutschet / reichlich gemehret / und gebesseret / auch zu lob Teutscher nation inn Truck verfertiget. Also daß auch der Gemeine mann alle Teutschen Historien / von anfang der Teutschen Keyserthum̅ biß zu gemeldeter zeit / in fürgestelleten personen leichtlich erkundigen.

Allen Fürstlichen / hohen Rittermeßigen / vnd Adelspersonen Teutscher nation gantz lustig / kurzweilig / vnd nutzlich von jren altorderen vnd vorfaren zulesen.

Getruckt zu Basel bey Niclaus Brylingers Erben / Anno M.D.Lvviii. [1568]

[…]

Vorred.

[…]

Weil dann die Teutschen letstlich deß Römischen Reichs hohe Mayester mit sampt der letsten Monarchey auff sich genom̅en / vnd diese yetz in die 768 jar mit aller außlendischer völckeren verwunderung (auß Gottes gnaden) bey jnen erhalten / hat sich auch begeben / daß Teutschland mit Religion / guten künsten / waffen / gesatzen / vnd gebeuwen auff das höchste bezieret / vnnd sich selbs mit allerely tugendten weit übertroffen / so doch die vralten Teutschen mehrtheil dieser stucken gemangelt / vnnd allein durch jhre waffen vnd grosse mannheit verrümpt gewesen / wie man dann solliches auß dem Ersten Theil dieser Historien genugsam verstanden. Deßhalben sich begeben / daß Teutsche nation auch allgemach nach außlendischer völckeren tugendten gestellet / vnnd letstlich alle anderen weit übertroffen / vnnd das höchste lob erlanget. Also haben wir von anfang der Teutschen Keyserthumb diesen vnseren Anderen Theil angefangen / vnnd letstlich miet grosser arbeit biß zu Keyser Maximiliani deß ersten Regierung / auß Gottes hilff / vollendet.

Inn diesem werden wir erstlich der Teutschen vnserer vorfaren from̅keit vnd weißheit vermercken / welche von from̅en gelerten leuten vnderrichtet / den Christlichen glauben angenom̅en / die Kirchen mit vil freyheiten bezieret / vnd die lehr deß Euangelij weit vnd breit bey den Barbaren vnd Abgöttischen völckeren außgespreitet. Damalen ist auch mitt sampt den guten künsten die Teutsche spraach viel zierlicher außgestrichen / vnd erstlich in geschrifft gebracht worden / dieweil man bißhar die offentlichen Instrument allein zu Latein gestellet / wie ich dieses bey den alten stifftungsbrieffen vnd Keyserlichen freyheiten hin vnd wider genugsam erkundiget. Nach disem werden wir hie vnserer altuorderen wunderbare tugendt erlernen / welliche mit deß leibs vnd gemüts vielfaltigen gaben bezieret / auch durch jhre starcken waffen jhnen das Keyserthum̅ bestetiget / vnd die wütenden völcker zu ring harum zum theil bezwungen / zum theil durch heilige personen dahin gebracht / daß sie friden geliebet / vnd in gehorsamkeit verharret. Weil wir aber 8 hochuerrümpten Teutschen Helden leben fürgestellet / haben wir auch mehrtheil Fürsten in Teutscher nation geschlecht ersuchet / vnnd dieser harkom̅en in Geburttafflen menglichem zusehen fürgestellet. Vnder disen sein etliche (wie dan̄ alles in dieser welt vnbestendig) durch die lange zeit abgangen / der mehrtheil aber sei noch gantz loblich vorhanden / welliche Gott zu gutem dem vatterland lang bewaren vnd erhalten wölle.

Man hat auch allezeit in Teutscher nation etliche fürneme Schulen inn den Clösteren oder hohen Stifften erfunden / auß welchen viel gelerte leut entstanden. biß letstlich der grössere theil der Occidentischen Kirchen angefangen fürnemlich nach reichtum̅ zustellen / vnd sich ab dieser welt pracht vn̄ eytelkeit zu verwunderen. damalen sein die gute Künst gemeinlich wider hin dersich zu den Griechen / vnd dan̄ zu den Araben gewichen. Als aber letstlich Constantinopel von den Türcken erobert / haben etliche fürnem̅e Griechen / so der feind veriagt / die guten künst vnd spraachen mit jnen in Italien oder Welschland gebracht / vnder wellichen Bessarion ein Cardinal / Guarinus / Georg Trapezontius / Theodorus Gaza / vnd andere der geleichen gewesen. Wie nun das geschrey von jhnen zu den Teutschen kom̅en / sein jren viel auß liebe der Freyen künsten in Italien gezogen / vnd die selbigen offentlich inn den schulen gehöret die guten bücher fürlesen / sein auch mit hohem verstand bezieret wider in Teutschland jr vatterland kommen. Vnder diesen waren Nicolaus von Cusa / Dionysius Rickel / Joannes Regiomontanus / Rodolphus Agricola / vnd viel andere / welche hernach in dem vatterland die Griechische spraach vnd rechte Philosophey gelernet / viel jünger bekom̅en / vnd die guten künst bey den Teutschen geoffenbaret / also daß dise letstlich durch jren hohen verstand alle anderen weit übertroffen / wie sollichs in dem Dritten theil weiter soll geoffenbaret werden. Es stiende aber einem undanckbaren vnnd liederlichen gemüt zu / diese vnsere altuorderen zu verschweigen oder zu vergessen / wie sich dan̄ auch der hochloblich Keyser Maximilian der erst / offt von den Teutschen selbs erklagt / als Johannes Stabius sein Mathematicus bezeuget.

Deßhalben hab ich diese arbeit allein auff mich genommen / vnd alle fürnemsten personen Teutscher nation auß allen Historien / Chronecken / vnnd geschichtrodeln (so viel mir müglich) zusam̅en gebracht / jr leben vnd thaten auff das kürzest beschriben / vnnd erstlich zu Latein inn Truck verfertiget. Weil ich auch verstanden / daß diese mein arbeit menglichem angenem / vnd aber fürnemlich den Teutschen zugehörig / hab ich diese auß hoher personen ermanung selbs verteutschet / vnd an viel orten gebesseret / vnd reichlich gewehret / wie man dan̄ dieses bey dem sternlein erkundigen mag / so zu diesen personen gestellet / welche vorhin inn dem Latein nit begriffen: Damit der selbigen nachkommende durch jhrer altuorderen tugendt bewegt / die laster fliehen / den tugendten anhangen / auch die ehr vnd freyheit / so durch jre vorfaren erlanget / gantz loblich jren kinderen vnd nachkom̅enden auch verlassen mögen. Es zweiffelt mir aber nit / daß in verlauffener zeit noch vil herrlicher / fürnem̅er Helden vnd Adelspersonen hin vnd wider in Teutscher nation gewesen / so jr vatterland auch höchlich durch jre tugendt bezieret / welche doch gar vergessen / vnnd in keinen Historien gemeldet worden. welches villicht auß der Scribenten farleßigkeit / oder mitt fleiß beschehen. dan̄ weil diese der gelerten lenten auß vnuerstand oder hochmut nicht geachtet / sein sie auch von jhnen mit billicher straff inn jhren bücheren vnder lassen / vnnd also mitt sampt jhren thaten vnnd gedechtnuß zu grund gangen. Deßhalben ich diese auch müssen fürübergehen / ob ich wol allen fleiß angewendet / damitt der hochuerdienten Teutschen leben / niemandt zu lieb oder zu leid / sonder die ware Historien zufürderen / inn diesem Werck fürgestellet vnnd geoffenbaret wurden. Wann ich auch etwas weiters von den alten erkundigen / will ich diser durch einen anlaß hernach in dem Dritten theil ehrliche meldung thun.

Dieweil aber inn diesem neuwen Teutschen buch (Hochwürdig / Durchleuchtig Fürsten) die Auspreiter vnnd erhalter vnsers Christenlichen glaubens / mit sampt andern hochuerstendigen personen: Deßgleichen alle nam̅hafften Fürsten vnd Helden / welche zu friden vnnd kriegszeiten vnser vatterland Teutsche nation bezieret / von dem Grossen Keyser Carolo biß auff Keyser Maximilianum fleißig beschriben / auch (so viel müglich) einer vmbden anderen gesetzt / hab ich auch zwen tugendreiche Herren und Patronen wöllen außerlesen / so inn Religions sachen / guten künsten / mannheit / vnnd burgerlichen sachen vnder anderē Fürsten hoch verrümpt / welchen ich mein fleiß vnd arbeit / nach altem loblichem gebrauch / dedicieren vnd zuschreiben möchte. Als ich mich nun fleißig bedacht / vnd nit gezweiffelt / es wurden viel Geistliche vnd Weltliche Fürsten oder Herren ein gnedigliches wolgefallen ab disem luftigen Werck tragēn / vorab weil jnen mein fürnemen wol bekant / vnd mehrheit jre gelerten Räth vnd diener treuwlichen darzu geholffen / hab ich doch diesem Anderen theil euwer beyde Fürstlichen gnaden / als meine hochgünstigen Herren / zu Patronen erwehlet.

[…]

III. Teutscher Nation Heldenbuch, 1570

Der dritte vnd letste Theil Teutscher Nation Heldenbuch : In diesem werden aller Hochverümpten Teutschen Personen / Geistlicher vnd Wältlicher hohen vnd nideren staths / Leben vnd nam̅haffte tathen gantz waarhafftig beschriben / welche durch jre tugendt / grosse authoritet / starcke waaffen / from̅keit / weißheit / vnd gute künst / vnder den vier letsten Keyseren Maximilian I. Carolo V. Ferdinando / vnd Maximilian II. von dem 1500 biß auff das lauffende 1570 jar / Jr Vatterland Teutsche Nation höchlich bezieret / vnd groß gemachet.

Erstlich durch den hochgelehrten Herren Heinrich Pantaleon / zum theil auß vieler völckeren Historien / Chronecken / vnd Geschichtrodlen / zum theil durch langer reiß in Teutscher Nation erfarnuß / vnd etlicher Fürsten / auch hochuerstendiger glaubwürdiger Herren anzeigung / mit grosser arbeit fleißig in Latein zusamen gebracht / vnd mit sampt vieler personen bildnussen fürgestellet. Jetzmalen aber von dem Authore selbs verteutschet / reichlich gemehret / geenderet / vnd gebesseret / auch zu lob Teutscher Nation in Truck verfertiget. Also das der gemeine man̄ alle neüwen Teutschen Historien / biß zu gemeldeter zeit / in fürgestelleten personen leichtlich erlernen.

Allen Fürstlichen / Geistlichen / Rittermeßigen / vnd Adelspersonen Teutscher Nation / gantz lustig / kurzeilig / vnd nutzlich von jren elteren vnd verwandten zulesen.

Getruckt zu Basel / bey Niclaus Brylingers Erben / jm M.D.L.X.X. Jar. [1570]

[…]

Huldrich von Hutten ein Franck.

Huldrich ist auß der edlen von Hutten geschlecht im Franckenland den 2 tag Aprellen im 1488 jar erboren: dieses ist ein guter vndd alter adel : dann ich finden das Erentreich von Hutten mit Conradt dem Herzogen zu Francken zu Keisers Heinrichs zeiten / da man zalt 935 jar / wider die Hunnen vnnd vnglöubigen zu feld gezogen / vnnd sich gar wol gehalten : es seind auch etliche auß jnen härnach zu Bischofflicher würde / vn̄ Fürstlicher hochheit gefürderet. Als nun Huldrich auch von diesem geschlecht härkommen / vnd mit einem guten kopff begabet / ist er durch seiner elteren rath dem studieren fleißig obgelegen / vnd in allen freyen künsten vnnd guten spraachen sehr zugenommen. Wie er auch ein hohē verstand / so was er in waaffen sehr wol geübet / vnnd hat grossen lust frembde nationen zu besichtigen. Deßhalben er auch Keiser Maximilian in Vendischen kriegen beystand gethon / vnd sich dermassen gehalten / das er von jm zu Ritter geschlagen vnnd sehr geliebet worden. Als aber härnach D. Luthers lehr durch seine predigt vnnd bücher außkommen / hat Huldrich sie auch angenommen / vnnd wider alle widersecher nach seinē vermögen beschirmet : er hat auch viel ding mit freyer zungen wider den Bapst / auch etliche Fürsten vnnd stett geschriben vnd geredt: darum̅ er auch auß seinem Vatterland weychen müssen. Nach diesem hatt er mancherley verß geschriben / welche man härnach zusamen gelesen / vnd lassen in truck kommen: dann er was ein guter Poet : also hat er auch etliche Orationes wider Huldrich den Fürsten zu Wirtenberg gestellet / vnnd jn etlicher tathen halb gestraffet: auff solliches hat er auch mit Erasmo etliche gespen bekommen / vnnd ist durch seine vielfaltigen bücher bey den Teutschen in grosser authoritet gewesen. Wie er dergestalt fürgefaren / ist er mit den bösen blatteren beflecket / vnd in Züricher landschafft kranck gelegen / da er auch zu end Augusti deß 1523 jar gestorben / vnd ehrlich begraben worden. Es haben jn auch etliche mit sonderbaren Epitaphijs vnd grabgeschrifften bezieret. Con. Gess.

[…]